Ho bayaa.n kaise fazilat Sayyade Sajjad(as) ki

Ho bayaa.n kaise fazilat Sayyade Sajjad(as) ki,

Karte hai Ayyub(as) midhat Sayyade Sajjad(as) ki,

Arsh ki zeenat ibaadat sayyade sajjaad(as) ki,

Khushq o tar pe hai hukumat Sayyade Sajjad(as) ki....

Deen ki surat thi surat Sayyade Sajjad(as) ki,

Qaid hoke thi hukumat Sayyade Sajjad(as) ki..

Banke haafiz deen ko jaawed o zinda kar diya,

Thi hifazat me karamat Sayyade Sajjad(as) ki...

Sajda o matam kabhi na chhodana gar chahe tu,

Tujhko mil jaaye Shifa'at Sayyade Sajjad(as) ki...

Qaid me to kon tha imdaad karta ha magar,

Bediya karti thi khidmat sayyade sajjad(as) ki..

Shaam k darbar me qaidi se darta tha yazeed,

Thi shahenshaah jaisi Haibat sayyade sajjad(as) ki...

Paa e aqdas ko jakad de isse pehle ba khuda,

Bediyo ne li izazat Sayyade Sajjad(as) ki...

Tauk e gardan bedi o zanjeer bhi hamsheer bhi,

Dekh kar roti thi gurbat Sayyade sajjad(as) ki...

Asre aashura jo hosh aya to tanha baap tha,

Ho bayaa.n kaise musibat Sayyade Sajjad(as) ki..

Haal koi puchnewala nahi tha qaid me,

Bekasi karti ayaadat sayyaade Sajjad(as) ki....

Shaam ke baazaar me darbaar me bhi ae Anees,

Dono jaa pe hai shahadat sayyade sajjad(as) ki..

-Anees Hyder