Fatema(sa), Zahra(sa) ki tarha deen ki tauqeer hai...

Fatema(sa), Zahra(sa) ki tarha deen ki tauqeer hai,
Binte Kaazim(as) Sayyeda ki hubahu tasveer hai....

Sur'ma dekha nahi aisa koi taareekh me,
Haske jo lashkar Rulaade sirf wo beshir hai....

Kyu na parwaane chale aaye dare shabbir(as) par,
Wehshato ki zulmato me bas yahi tanveer hai...

Dil se shayad hum nahi kehte hai maula Al Ajal,
Is liye hi aapke aane me ye takheer hai....

Aayate Quraan hai marta nahi koi shaheed,
Shah ka Neze pe jaake bolna tafseer hai...

Laa fataah illa Ali la saif illa zulfiqar,
Arsh me gunji sadaa naazil hui shamsheer hai....

Saat bete paake raahib bol utha ye fakhra se,
Fatema(sa) ka ladlaa to qaatibe taqdeer hai.....

Yaad ghaazi ko karo jab bhi pio paani Anees,
Chashme paani ke sabhi Abbas(as) ki Jaageer hai....

-Anees Hyder